رواية بيوت النار(قصه عاهرة)باللهجه العراقيه

[حـكـايات زوج مـعاصـر]

عاهرة....




رخيصه.....




ساقطه...




كح...ة




عديمه شرف ....




ما متربايه .....




كلهن صفات تعودت ذهب علئ سمعاهن ...سمعتهن بكثرة لدرجه يمكن ما تتأثر بيهن او تدعي انها ماتتأثر بيهن




باوعت علئ وجهها بالمرايه لازمه قلم حمرة وتحط منها الجمال الي كل البنات الي وياهه يحسدنها عليه نقمه مو نعمه بالنسبه الهه ...عافت قلم الحمرة ولزمت مشط وكامت تمشط شعرها طوله وسط لنص ظهرها لونه عسلي علئ خشبي لون حلو بس بحكم شغلها ضايفه اله وصلات شعر صناعيه زايدة طوله اكثر لجوة خلفيتها ...اندكت باب غرفتها ...كلبت عيونها ليفوك وكامت تنفخ من ورة خشمها




ذهب:-فووووت عساني لا صبحت ولا شفت وجهك النحس
حلاوة بطريقه كلام مالها علاقه بجنس الرجوله الي ينتمي اله يتكلم بطريقه بيها مياعه ويطك العلج بحلكه:- مقبوله منج حبيبه جيت اصيحج الست رشا تريدج ...




اندارت عليه وحطت رجل فوك رجل ورفعت حاجبها الحاد:-خير من الصبح شرايدة....




حرك جتافه بطريقه تدل علئ جهله :-ماعرف ماكالت يلا لا تتأخرين وطلع ......




حلاوة اسمه الحقيقي،سعد بس الكل يصيحله بلقب حلاوة والسبب لانه ميسوي اي خدمه ببلاش ويطلب عليها حلاوة حسب تشبيهه بالضبط رجال عمره نهايه الاربعينات قصير ممتلئ شويه شعرة خفيف واسمر هذا اليد اليمنه لست رشا ......




كامت ذهب وطلعت من الغرفه ونزلت للصاله الي تكعد بيها رشا ...نزلت الدرج ورنت حجلها تصدح بالمكان




رفعت رشا عينها عالدرج وطلعت دخان النرگيله من خشمها وابتسمت ابتسامه بيها اكثر من معنئ ....




رشا :- يا اهلا بالست ذهب صايرين منشوفج الا ندز ورة حضرتج ....




مطت ذهب شفايفها بانزعاج وكعدت وحطت رجل علئ رجل وتحركهن بنفاذ صبر :-خير من الصبح شعندج .... تدرين تعبانه وماحب احد يضوجني ....




رشا باستهزاء:-ديلا عساس كطعتي السمجه وذيلها بالف توسيل يلا نزلتي ساعه وهزيتي شويه يمنه ويسرة ....




رفعت ذهب حاجبها بعدائيه:- تدرين بيه اكره اركص بالبار من يكون الضيف هذا الگو... موجود .....




رشا بأنفعال :-لان غبيه لج ثوله علمودج يذب الاف الدولارات مشفتي شلون خله زلمه يسوون الفلوس مطر عليج وانتي تركصين ...




ذهب بملل:- خلي فلوسه اله ماطيق وجهه ولا تحلمين ابد اخلي يطخني ....وكامت وكفت واقتربت من رشا ونزلت يم اذنها وشاورتها:- لا تحلمين انفذ الج امر اني اسوي الي يعجبني وويه الي يعجبني واذا خايفه علئ زبونج العزيز (الثكيل) يطير نامي انتي وياه ووخرت عنها وهي تضحك وتوجهت للدرج تصعد .....







رشا بغضب وهي تصيح وشمرت القمجي مال النرگيله:-خل انشوف عنادج وين يوصلج لا عبالج خالتج علئ حل شعرج تتكبرين عليه ذهب خاتون ترا انتي راقصه وكح..ة تشتغل يمي مو دكتورة وشهادتج اطول منج وشايخه عليه ......


ذهب وكفت عالدرج واندرات عليها تباوعلها من فوك بنظرات كارهه :- صح اني گح..ة واشتغل يمج وانتي الكوا..ة مالتنه هم لا تنسين هالشي يعني اوصخ بمراحل من عدنا .... بس صدكي واعتقدي انام ويه حلاوة وما انام ويه هذا ...


حلاوة سمعها كام يضحك:-ياريت والله


ذهب نترت بي:-انجب لك بقو عليه بس المخانيث هاهيه


حلاوة:-مقبوله من الذهب .....


رجعت لغرفتها وقبل لتسد الباب عاطت بصوت عالي :-ماريد ولا زباله بيكم يدك باب غرفتي واذا سمعت صوت يم غرفتي احرك البيت علئ روسكم وركعت الباب بكل قوتها وقفلته للاحتياط حتئ محد يضوجها ....ذبت نفسها عالجربايه ونفس الاسطوانه تنعاد براسهه


اني ذهب بنيه عايشه بيت دعارة صارلي ثمان سنوات من عمري جان 12 سنه بكل بساطه اني عاهرة راقصه ...ابيع الحب بفلوس مثل مايكولون بائعه هوئ ...اي اني عاهرة ابيع جسمي للي يدفع ....عاهرة من الطراز الثقيل


بيت الدعارة الي تعيش بي ذهب ما موجود بالمناطق الي تنوجد بيها هيج بيوت لا بالعكس موجود بأرقئ منطقه ببغداد ...الزبائن مو اي زبائن ولا يجون للبيت كلهم زبائن من العيار الثقيل ضباط مسؤؤلين حتئ نواب وزراء
تجار رجال اعمال يعني بس الجيوب الثقيله والبنات بنطلبن بالاسم كل وحدة والهه جمهور كامل حالهه حال الفنانه


كل وحدة عايشه ويه ذهب اختاروها بعنايه كلهن جميلات بصورة ملفته يمتلكن جمال واجساد تخلي اكبر رجال يسيل لعابه ....لان مو اي بنات هن ...بنات مخصصات للرجال المهمين ....حفلات خاصه.. بارات راقيه.. سعر تذكرة الدخول الهه بالدولار .....
ذهب جانت اكثر وحدة مميزة ببيت العسل مثل ما يسمون بيتهم بسبب كثرة البنات الحلوات بي سموا روادة بيت العسل ....جمالها ملفت ومثير قوام ممشوق ومثير متروس بالاماكن المناسبه منحنيات مرسومه بشرة حنطيه مائله للبياض وملامح مثاليه وعيون قاتله نظرة وحدة منها جلسه تنويم مغناطيسي اكثر وحدة مطلوبه ببيت العسل ...هالشي خله شخصيه ذهب تكون قويه خاصه علئ رشا ...متكدر تفرض عليها زبون حتئ لا تتمرد عليها نص وارد البيت من ورة ذهب وجمالها جان اسمها بدار الايتام ريتاج بس من اجت رشا بغطاء العفه هي وزوجها وسوت نفسها امرأة محترمه محرومه من الاطفال اختارت ريتاج الطفله بعمر 12 سنه من بين كل البنات لان جانت حلوة سمتها ذهب لان عرفت راح تحصد من وراهه ذهب بالمستقبل وفعلا حصدت ذهب .....


ظلت ذهب متمددة وتباوع للسكف وشريط حياتها بهالبيت يمر كدام عيونها مثل كل يوم ...اتذكرت اول مرة ركصت بي ببار اول مرة يلمسها زبون واخذ شرفها جان عمرها 15 من بدت تستقبل زباين اشتره عذريتها ضابط دفع مبلغ جبير حتئ هو يكون اول شخص يلمسها شافهه تركص ويه البنات وعيونه ما كدر يشيلها عنها .....
ابتسمت بأستهزاء حياة يفتخر بيها كولش







ظلت بغرفتها للعشرة بالليل اندك باب غرفتها سمعت نرجس وحدة من البنات تصيحها :-ذهب حضري نفسج اكو حفله ترا مو تنسين انتي ب12 يبدا العرض مالتج ....


ذهب بملل وهي تكوم:-يي مراح اطير راح اتحضر


كامت سبحت رتبت شعرها رسمت عيونها وحطت حمرة لونها احمر قاتم ولبست فستان احمر طويل يرهم للركص ومخصر علئ منحنيات جسمها


نزلت لابسه فوكاه مثل الجبه طويله وصوت الحجل والكعب يرنن بالمكان
صاحت حلاوة اجاهه يركض:-لج هلا بالملكه هلا بأحلاهن هلا بملكه جمال العراق كله


ذهب رفعت حاجبهه:-مو وكت لواكتك حلاوة افندي السايق وين حتئ اولي عندي عرض ب12 ترا وكامت تحجي بصوت عالي حتئ رشا تسمعها بالغرفه واليوم ماروح ويه اي زبون مالي خلك اركص وارجع يكون بعلمكم


حلاوة يريد يلم السالفه حتئ وشا وذهب ميتعاركن :-السايق برا ينتظرج حبيبه انتي تأمرين امر الي تريدي يصير


وصلت للبار جان اكو مطرب معروف يغني وكل الحضور مطروبين ويركصون ويكيتون فلوس عالبنات الي يركصن والسكارة والي متعاطين وميدرون الله وين حاطهم ابتسمت بأستهزأء ابن وزير كرايب نائب رجل اعمال تاجر وين الطاك موجود كعدت علئ طاولتها كبل النادل حطلها نركيله بصفها لمحها المطرب وكام يقدم تحايا الها ...


المطرب وهو يأشر الها بتحيه عسكريه (يتلوك):-يعني الملكه يعني الجمال كله يعني ذهب الذهب نور المكان


ابتسمت اله ومجرد حركت راسهه ترد التحيه بعد شويه يبلش عرضها جابلهه نادل كلاص وبي مشروب رفعت حاجبهه اله الكل يعرف هي الشي الوحيد الي متقبل تسوي الشرب ضحكت بصوت عالي تستهزء من نفسها رجعت راسهه ليورة وهي تضحك وحطت ايدها علئ حلكها ورجعت باوعت لنادل :-اني اركص اي عاهرة اي بس مال اشرب ولك لااا دادة استحرم وضحكت ضحكه عاليه ...واختفت ضحكتها الشرب يخرب جمالي وخرة من كدامي لا افين حظك هو كبل طفر خاف لا ينطرد من شغله من وراهه


ظلت تنرگل وتنفخ بدخان النرگيله ليفوك مال وحدة خبرة ونص العيون عليها بعد نص ساعه يبلش عرضها والبنات بلشن ينزلن من المسرح وحدة ورة وحدة الي كعدت يم زبون والي دخلت ترتاح من الرگص هههه اي ترتاح لان الركص يتعب ....


ب12 كامت عدلت فستانها وسعرها وصعدت المسرح بكل ثقه تتمايل مثل اللبوة بخطواتهه وصارت بالوسط بلشت الاغنيه تصدح وهي تركص عليها سالبه عقول الموجودين الفلوس صارت عليها مثل المطر ...جان اكو زبون دائمي ابو نائب بالبرلمان ابتسمت وهي تركص وتفتر ونزلت الستيج وصلت لحد الطاوله مالته جرت الكرسي الي بصفه وهو يباوعلها بشهوة صعدت عليه وصعدت بنص الطاوله مالته وتهز بخصرها بأحترافيه هو ابتسم وطلع جنطه فلوس من جوة الميز وكام يفتح شدات دولارات ويذب فوكاهه وهي تفتر شعر شعر جانت ناويه تخلص فلوسه اليوم بس شيخلصهن ابو اكبر حرامي نص فلوس العراق بجيبه ظل يكيت فوكاهه لحد ما انترس المكان فلوس نزلت بأغراء وباسته من خدة وهي تبتسم ابتسامه لعوب ورجعت للمسرح







.........بقلمي رفل حسن .....


فتحت البردات وهي تحجي:-عيني ست ذهب صباح الخير لو نكول مساء الخير .....


ذهب وهي تحط راسهه جوا المخدة:-لج ساااارة سدي البردة اريد اناام تعبانه ....


كعدت سارة عالجربايه بصفها وتجر بالبطانيه:-لج كوومي لعد لو جان عندج زبون جان شسويتي هو بس ركص


رفعت راسهه ذهب :-اصلا الركص يتعب اكثر ...


سارة:-لج سمعت الكيت عليج صار مطر حلاوة كال ذهب فلستهم اابارحه ...


ابتسمت :-لعد شعبالج .وضحكت .....



...................


غسان:-جنيد بداعتي اقبل العزيمه ولا تعند


جنيد بملل:-مالي خلك كعداتكم ..انه ما افوت هيج اماكن وانت تدري ....


غسان:-عمي هسه لا تشرب ولا تكيت بس اريد اشوفك الاجواء ولك اكو طيرة هناك اذا شفتها توكف عقلك


جنيد بعصبيه:-غسااان انه رجال متزوج وعندي جهال انوب عليه الكح...ب خايب شلي بدوخه الراس


غسان:-زين مرة وحدة وراهه اوعدك مراح اكولك روح


جنيد :-افكررر هسه عوفنه من هالسالفه الماصخه وجيبيلي الوصولات مال البضاعه الجديدة خلي ندققها لا مثل ذيج المرة يطلع غلط بالحساب


غسان:-عاد انت ذلني يوميه وذكرني هو صفر واحد نسيته ما انتبهت عليه ....وكام يضحك .....



ذهب مجتفه ايدها علئ صدرها :-اعتقد المفروض اليوم اغير غرفتي لو اني غلطانه


رشا من ورة خشمهه:-مو وكتج ...


ذهب كبل ثارت وكامت تصيح:-لييش عيوني اعتقد الفلوس من شغلي اغيرها يعني اغيرها لعبت نفسي منها ومن ذوقها السخيف ادري شنو زعطوطه اني غرفتي اخشابها لون وردي ....اريد ازوع من لونها عبالك غرفه مراهقه اليوم اروح اجيب غرفه جديدة لو تنكلب الدنيا


وصاحت بصوت عالي :-حلااااااااوة وينك ....


اجه حلاوة يركض جان كاعد بالمطبخ يسمعهن كالعادة:-اجيت عيوني اجيت


ذهب رافعه حاجبها وتباوع لرشا بتحدي:-جيب سويج سيارتي الي هي بفلوسي


حلاوة ظل مرتبك يباوع لرشا وذهب عاطت ذهب:-يلاااااا


حلاوة:-حاضر حاضر ويباوع لرشا باعتذار وراح


ذهب:- رشا خلينا نتعامل بالطيب بينا احسلج تعرفين شنو اكدر اسوي وفرقعت اصابيعها :-اشارة مني افلش هذا البيت علئ راس الكاعدين بي واندارت راحت لغرفتها



نزلت مبدله وكاشخه وحلاوة ينتظرها لازم بيدة سويج السيارة اخذته من ايده وطلعت


رشا:-تمرد ذهب صاير فوك الحد يعني شلون وياهه







حلاوة:-ميخالف خانم انتي هم علئ كيفج وياهه لا تزعلين بس تعاملج وياهه مو شي وهي منجم ذهب النه


رشا:-الا اكسر راسهه اني اعلمها ....



تمشي بشوراع بغداد تباوع حواليها بنات طبيعيات الي طالعه ويه صديقاتها والي ويه اهلها وعايشات حياة طبيعيه مرات كلبها يرف وتتمنئ تكون بنيه عاديه مثل كل البنات بس ترجع تذكر نفسها بعهرها هي عاهرة وبس ومراح تكون بنت بيت طبيعيه



جنيد:- اي عيني انشالله حمودي شلونه بعدة مصخن ديري بالج عليه لا ما اتاخر انشالله بس عدنه بضاعه جديدة واثاث جديد والمعرض خبصه والعمال ما يشتغلون عدل اذا مو اوكف فوك روسهم يلا عيني مع السلامه وسد التليفون واندار حتئ يصيح غسان جان يسمع صوت بنيه ناعم عالي


طلع من مكتبه ودور بعيونه عن مكان الصوت



ذهب :-انت متستحي متخجل جاي اسالك عن سعر هاي الغرفه المن هالكلام الماصخ بس العتب مو عليك علئ الي مشغلك هنا


العامل :-هسه ليش العصبيه يا عيوني



جنيد بعصبيه :-امجدددد ....


ارتبك العامل امجد وبلش يعتذر :-اسف مو قصدي اني اعتذر


جنيد بخزرة:-روح للمخزن اني اشوف الاخت هنا ...



ظل صافن عليها وهي ترزل امجد رافعه تك حاجب وعيونها الملونه تجدح وحمار خفيف يكتسح خدودها بسبب انفعالها ايه من الجمال الشعر ..الجسم الترافه احتاج وكت حتئ ينتبه ويصيح بالعامل الي جان يتغزل بيها بوقاحه وقله ادب



جنيد وهو يتفرس بملامحها وياشر علئ صدرة:-اني اعتذر بنيابه عنه حسبيها عليه


ذهب وانفعالها شويه خف :-لازم مديرة يعلمه شلون يحجي باحترام ويه الي يشترون منه ....



جنيد :- صح كلامج .. هسه تفضلي واختاري الي يعجبج وكهديه من عدنا نسويلج تخفيض


رفعت حاجبها :-ماريد تخفيض شكرا ومراح اشتري منكم عن اذنك واندارت وبدت تمشي حتئ تطلع وجنيد يلحكها بنظراته .....



ورة شويه اجه غسان :-ها شكلت اليوم اني عازمك ...



جنيد:-اذا ماقبل ادري بيك راح تظل تلح بس هلمرة اقبل


غسان:-هذا الحجي الزين اليوم اونسك ونسه من العمر



اطياف وهي تلبس جنيد سترته :-يعني هسه وكت عزيمه غسان علئ العشه عبالي نسهر سوة ...اندار عليها باس كصتها :-ميخالف عيوني بس اليوم وباجر نسهر للصبح يا حلو وكرصها من خدها



وصلو الملهئ غسان مكيف وعايش الجو متعود علئ هيج طلعات وونسات وجنيد جاي من ورة خشمه وملامح وجهه جامدة واتذكر الحلوة الي اجت لمعرض الاثاث اليوم



اول مطبوا جنيد كره الجو سكر وعربدة وكاوليه وركص جو كريه بنسبه اله ....مقبل يشرب طلب بس نركيله
انتبه لتغير الاضويه عالستيج وطبت لبوة ايي لبوة جانت تمشي بخطوات ملكه جسد مليكانه لابس فستان ذهبي براق بس الوجه مو واضح هلكد لان متغطي نصه بخصلات شعر غجريه ضيق عيونه ويباوع الهه جان غسان يشاورة :-هاي البنيه موكفه زلم بغداد علئ حيلهم اكبر واحد تجيبه
جنيد :-شسمها
غسان بضحكه:-مو كتلك تجيب اكبر واحد ذهب اسمها ذهب


جنيد وهو يجرب وقع الاسم علئ لسانه :-ذهب ...كلتلي ذهب



انصدم من شاف وجهها عرفها فورا نفس البنيه هي نفسها بدون شك جانت تركص وتتنقل بين المسرح والطاولات اشرلها غسان بدون مينتبه جنيد الي جان مركز بيها
شافهه تقترب منهم ولاحظ اختلاف نظرتها من شافته وتوقع عرفته


حولت نظراتها لغسان وابتسمت وهي تصعد عالميز وركصت بحركات مغريه خلت غسان يذب عليها كومه فلوس كل هذا وجنيد مابدرت منه اي ردة فعل فقط مثبت نظراته عليها