رواية بيوت النار(قصه عاهرة)باللهجه العراقيه - 5

[حـكـايات زوج مـعاصـر]

مر شهرين وذهب عايشه بهذا القفص الذهبي بس يبقى قفص سجن يوم معارك هي جنيد ويوم تلتزم الهدوء تريد تعرف شنو مصيرها شنو ناوي بشنو يفكر مدتعرف مثل كل يوم كاعدة وصافنه عالتلفزيون بصاله بس بدون اي انتباه سمعت صوت هوسه برا استغربت المزرعه هدوئها مثل هدوء المقابر حتى الحرس متسمعلهم صوت فتحت الباب وطلعت انتبهت اكو حركه وصوت يم البوابه تمشت لحد هناك شافت بنيه يطلع عمرها نهايه العشرينيات محجبه حلوة ومرتبه تصيح على حرس




ذهب باستغراب:-هاي شديصير هنا شكو




اطياف وهي تباوع لذهب بحقد :-حلووو هاي انتي الكح...ة الي رجلي ملتهي بيها هالفترة




ذهب بحدة :-احترمي نفسج منو انتي اصلا ؟




اطياف بابتسامه جانبيه وجتفت ايديها :-اني اطياف مرت جنيد وام جهاله مرت جنيد الي حضرتج ملتفه عليه مثل الحيه




ارتبكت معرفت شتسوي اول مرة تنحط بهيج موقف صح جانت تلتقي بزلم بس بحياتها ما احتكت ويه زوجه واحد ٠٠٠٠باوعت لاطياف ببرود والتفتت واندارت ترجع ليجوة




صاحت اطياف من وراهه :-عوفي اتركي خلصو الزلم اجيتي على جنيد




وكفت ذهب بمكانهه وعصبت ملامح وجهها صارت حادة واندارت عسريع ومشت باتجاه اطياف وكفت كدامهه :- غلطاانه كولش مدام ياريت انتي تكولين لزوجج يعوفني بحالي




بنفس اللحظه اطياف رفعت ايدها وضربت ذهب راشدي قوي خلتها توكع ليورة
اطياف بصياح:- كح..ة ساق..ه اذا ما اشوفج نجوم الظهر ماكون اني اطياف وعافتهه ومشت





ذل اهانه قهر كلهن انجمعن سوة بداخلها حالتها النفسيه وصلت على الحافه تحس عقلها بلش يفقد توازنه





انتظرته يجي لساعات وهو ماكو لحد ماغفت بالصاله بدون متحس على نفسها




حست على نفسها من انشالت بين ايدين احد عرفته من لمسته من عطرة حطت راسهه على صدره وهمست بدون وعي:-جنت انتظرك
جنيد بهمس :- اجيتج حبيبي وصعدها فوك





ثاني يوم تريكوا سوة بهدوء جانت متوترة من شغلتين وحدة منهن جيه اطياف مرته بس متريد تكوله عنها لذلك مراح تحجي بموضوع مرته




جنيد مبتسم:-كولي يالذهب عندج كلام غرد يالطير




ذهب:- احتاج اروح لدكتورة




جنيد حط فنجان الكهوة من ايده:-بيج شي خير مريضه تحسين بوجع ..




ذهب هزت راسهه:-لا مو مريضه جنيد بس ...




جنيد بترقب :-بس شنو ؟




ذهب:-تأخرت ..




جنيد رفع حاجبه:-شنو هي الي تأخرت ؟







ذهب:-يعني متعرف شنو هي الي تجي كل شهر..


فتح عيونه :-شنو قصدج شكد يعني وعلى اي اساس ...


ذهب:-تقريبا عشر ايام وحضرتك تجي وتروح كم ساعه مالحك اكولك


جنيد بعصبيه:-حضرت جنابج حامل ؟؟؟


ذهب:-مااااعرف ولهذا السبب اريد اروح لدكتورة نسائيه ؟؟؟


جنيد كام من مكانه بعصبيه :-حضري نفسج بسرعه نروح فورا للمستشفى ونعرف حضرتج شمصخمه


كامت من مكانهه بعصبيه لدرجه الكرسي وكع وراهه باوعتله بغضب:- شنو حضرتي شمصخمه لعد شنو متوقع مثلا اذا حضرتك ماخذ راحتك عالاخير


جنيد ببرود:-يكون بعلمج اذا جنتي حامل ميبقه ببطنج دقيقه تنزلي..


باوعتله بقهر جانت تعرف هذا الشي هي اصلا تعرف نفسها حامل من كم يوم سوت اختبار منزلي وعرفت بس تريد اي حجه حتى تطلع من المزرعه الي صارلهه شهور محبوسه بيها للحظه حلمت حلم وردي انو يكون عدهه عيله وبيت وطفل طبيعين بس ضربت نفسها حتى تصحى من الاحلام المستحيله


عافته وصعدت بدلت هدومها ونزلت باوعلهه صفح :-وين الحجاب ؟؟؟؟


ذهب بعناد :-مالبس حجاب اني ليش هالنفاق ؟؟؟
جنيد :-كدامج دقيقتين تنزلين لابسه شي على راسج والا تشوفين شي ميعجبج


تنهدت بتعب واستسلام وصعدت اخذت شال ولفته ونزلت ويا



جانت صافنه تباوع بدون هدف كدامهه لحد ماحست السيارة وكفت باوعت حواليهه كدامهه مستشفى اهلي مبين راقي


جنيد ببرود:-نزلي ..ونزل من السيارة ...


نزلت وطبت ويا حتى يم استعلامات ما وكفو وكأنو ويعرف بضبط وين يروح وكأنو هو مدير المستشفى محد يكوله وين طاب صعدو بالمصعد وداس زر الطابق الثالث



الدكتورة:-مثلما انتو متوقعين المدام حامل استاذ جنيد


جنيد بجمود:-شكد حامل


الدكتورة :-ست اسابيع مو اكثر ....


باوع لذهب صفح ورجع انتباهه لدكتورة:- نريد ننزل الطفل


باوعتله الدكتورة بتوتر واستغراب ووجهت نظراتها لذهب :-عفوا استاذ بس هالشي حرام بدون سبب


جنيد:-هذا مو شغلج انتي العليج تاخذين فلوسج وتسوين المطلوب منج ...


الدكتورة بتردد:- ماشي بس لازم نسوي فحوصات تفضلي ويايه مدام


بداخل غرفه التحاليل الدكتورة سألتها اذا هي مجبورة تنزل الحمل وذهب نكرت هالشي



بعد نص ساعه التحاليل جانت كدام الدكتورة :-استاذ تحاليلها تمام بس عدهه اضطراب بسيط بضربات القلب عدهه خفقان لازم تاخذ من هاي الحبوب لمدة كم يوم يلا نسوي عمليه الكورتاج (عمليه الاجهاض المتعمد باشراف طبي)
جنيد:-ليش ميصير هسه ؟؟